काठमाडौं : बंगबन्धु गोल्डकप फुटबल प्रतियोगिताअन्तर्गत शनिबार समूहगत चरणको आफ्नो अन्तिम खेलमा प्यालेस्टाइनविरुद्ध मैदानमा उत्रँदा नेपालले मुस्किल चुनौतीको महसुस गर्नेछ । किनभने प्यालेस्टाइनविरुद्धको यही खेलसँग प्रतियोगितामा नेपालको भविष्य जोडिएको छ । साबिक विजेता नेपाललाई सेमिफाइनल यात्रा तय गर्न कुनै पनि अवस्थामा प्यालेस्टाइनलाई पराजित गर्नुपर्ने बाध्यता छ । बराबरी वा पराजयको नतिजाले प्रतियोगितामा नेपालको यात्रा समूहगत चरणमै रोकिने निश्चित छ ।
यद्यपि शनिबारको खेल अघि प्यालेस्टाइन आफूविरुद्धको विगत र जारी प्रतियोगिताको प्रदर्शनका आधारमा नेपालका लागि निक्कै कठिन प्रतिद्वन्द्वी देखिएको छ ।
समूह एमा प्यालेस्टाइनसँगै ताजकिस्तानले तीन÷तीन अंक बटुलिसकेका छन् । आफ्नो पहिलो खेलमा ताजकिस्तानसँग २–० गोलले पराजित भएको नेपाल समूहमा अंकविहीन छ । बिहीबार भएको खेलमा उही ताजकिस्तानलाई २–० गोलले पराजित गर्दै प्यालेस्टाइनले महŒवपूर्ण तीन अंक जोडेको हो । त्यसैले पनि शनिबार निर्णायक खेलमा बलियो प्यालेस्टाइनलाई पराजित गर्दै प्रतियोगितामा उपाधि रक्षा गर्ने अभियानलाई जीवित राख्न नेपाललाई निकै मेहनत गर्नुपर्ने देखिएको छ ।
सन् २०१६ मा उपाधि जित्दा पाउनुपर्ने पुरस्कार रकममध्ये २५ हजार डलर बंगलादेश फुटबल संघले दिन ढिला गरेपछि निक्कै छोटो तयारीमा प्रतियोगिता खेल्न गएको नेपाल ताजकिस्तानसँगको खेलमा नै कमजोर देखिएको थियो । त्यसका साथै जारी प्रतियोगितामा प्यालेस्टाइनले सशक्त प्रदर्शन गरिरहेको छ भने विगतको नतिजाले समेत नेपाललाई कमजोर प्रतिद्वन्द्वीको रूपमा प्रस्तुत गरेको छ ।
नेपालले यसअघि एसियाली फुटबल महासंघ (एएफसी) च्यालेन्ज कपअन्तर्गतका खेलहरूमा प्यालेस्टाइनसँग तीन पटक काठमाडौंमै प्रतिस्पर्धा गरेको छ । यद्यपि यी तीनै खेलमा नेपाल प्यालेस्टाइनसँग जित निकाल्न असफल रहँदै आएको छ । नेपालले सन् २००९ र सन् २०१४ मा एएफसी च्यालेन्च कपको छनोट प्रतियोगितामा प्यालेस्टाइनसँग प्रतिस्पर्धा गर्दा दुवै पटक गोलरहित बराबरीको नतिजा निकालेको थियो । यद्यपि सन् २०१२ मा च्यालेन्ज कपको अन्तिम चरणको प्रतियोगितामै प्रतिस्पर्धा गर्दा भने नेपाल प्यालेस्टाइनसँग २–० गोलले पराजित भएको थियो ।
आफ्नो खराब इतिहासलाई मेटाउन मात्रै हैन, प्रतियोगितामा उपाधि रक्षाको अभियानलाई जारी राख्न पनि अन्तर्राष्ट्रिय फुटबल महासंघ (फिफा) को वरीयतामा आफूभन्दा ४० स्थान माथि रहेको प्यालेस्टाइन (१००) विरुद्ध नेपाललाई सशक्त प्रदर्शन गर्न आवश्यक देखिएको छ ।
Source : Annapurna Post
No comments:
Post a Comment